By एभरेष्ट अन्लाईन खबर 
काठमाडौ,१३ भदौ ।
नेपाली कांग्रेसले स्थानीय तह निर्वाचनका लागि प्रदेश नम्बर दुईमा ८० प्रतिशत उम्मेदवारको टुंगो लगाएको जनाएको छ । उम्मेदवारको नाम सर्वसम्मतीमा टुंगो लगाउने प्रयासमा केन्द्रीय कार्यालय सानेपामा केही दिनदेखि लगातार चलिरहेको छलफलले ८० प्रतिशत उम्मेदवारको नाममा सहमति जुटाएको जनाइएको छ ।
केही दिनदेखि पार्टी कार्यालय सानेपामा प्रदेश नम्बर दुईका सांसद, केन्द्रीय सदस्य तथा जिल्ला सभापतिहरुको संयुक्त बैठक बसिरहेको छ । प्रदेश नम्बर २ का सिरहा, सप्तरी, सर्लाही र महोत्तरी,धनुषा, बारा, पर्सा र रौतहट जिल्लाको छलफल सकेपछि उम्मेदवारीको अन्तिम निर्णय गरिने स्रोतले जनाएको छ ।
संविधान संशोधन विधेयक संसदबाट पास गराउने विषय र तराईका जिल्लामा आएको बाढी र डुबान समस्याले केही ढिलाई भएको भन्दै कांग्रेसले भदौ दोस्रो साताभित्र सबै उम्मेदवारको नाम टुंगो लगाउने बताएको थियो । स्थानीय तहको तेस्रो चरण अन्र्तगत प्रदेश नम्बर २ मा आगामी असोज २ गतेका लागि निर्वाचनको मिति तोकिएको छ ।
