By एभरेष्ट अन्लाईन खबर 
काठमाडौं । नेकपा एमालेका अध्यक्ष केपी शर्मा ओलीले सरकारको नेतृत्व गरिरहेको नेपाली कांग्रेसको कारणले राष्ट्रिय जनता पार्टी (राजपा) नेपाल चुनावबाट अलग भएको दावी गर्नुभएको छ ।
चीनको मानसरोवर यात्रा गरी शुक्रबार स्वदेश फर्किनु भएका अध्यक्ष ओलीले त्रिभुवन अन्तर्राष्ट्रिय विमानस्थलमा पत्रकारहरुसँग कुराकानी गर्दै तेस्रो चरणको स्थानीय चुनावमा पनि कांग्रेसले राजपालाई ल्याउन नचाहेको आरोप लगाउनुभयो । दोस्रो चरणको चुनावमा भाग लिन राजपा इच्छुक भएपनि कांग्रेसले घुमाई फिराई भाग लिन नदिएको उहाँले बताउनुभयो । कांग्रेसले अब तेस्रो चरणमा पनि राजपालाई भाग नलिने वातावरण बनाउन लागिरहेको उहाँको दावी छ ।
राजपाले नेपाली कांग्रेससँग मिलेर नेकपा एमालेमाथि प्रहार गरिरहेको भन्दै अध्यक्ष ओलीले राजपाले समयमै यो कुरा बुझ्नुपर्ने बताउनुभयो । संविधान संशोधनको विषयमा कांग्रेसले अहिले पनि दाउपेच र छलछाम गर्न लागेको भन्दै ओलीले स्थानीय तह, प्रदेश र केन्द्रको चुनाव नसकिएसम्म संविधान संशोधनको विषयमा छलफल गर्न नसकिने स्पष्ट पार्नुभयो ।
