चिनियाँ नेतृत्वसँगको उच्चस्तरीय संवादले आगामी दिनमा नेपाल-चीन सम्बन्धलाई नयाँ उचाइमा

काठमाडौँ।

चीनको ४ दिने औपचारिक भ्रमणमा रहेका नेपालका परराष्ट्रमन्त्री शिशिर खनाल र चिनियाँ समकक्षी वाङ यीबीच द्विपक्षीय हित र कूटनीतिक सम्बन्धका विविध आयाममा केन्द्रित रही उच्चस्तरीय भेटवार्ता सम्पन्न भएको छ। नेपाली परराष्ट्रमन्त्री खनाल र चिनियाँ विदेशमन्त्री वाङ यीबीचको यस महत्त्वपूर्ण भेटघाटलाई चिनियाँ सरकारी सञ्चारमाध्यम ‘चाइना डेली’ ले प्रमुखताका साथ प्रकाशन गरेको छ।

बेल्ट एन्ड रोड (BRI) र कनेक्टिभिटीमा जोड

भेटवार्ताका क्रममा चिनियाँ विदेशमन्त्री वाङ यीले उच्च गुणस्तरको बेल्ट एन्ड रोड (बीआरआई) सहकार्यलाई अघि बढाउन चीन पूर्ण रूपमा तयार रहेको स्पष्ट पार्नुभयो। साथै, नेपाललाई भूपरिवेष्ठित (Land-locked) देशबाट भूजडित (Land-linked) देशमा रूपान्तरण गर्नका लागि चीनले हरसम्भव सहयोग र साझेदारी गर्ने प्रतिबद्धता समेत व्यक्त गर्नुभएको समाचारमा उल्लेख छ।

नेपाल चीनको छमेकी कूटनीतिमा प्राथमिकतामा

नेपाल र नेपाली जनताप्रति चीनको सधैँ मैत्रीपूर्ण नीति रहँदै आएको स्मरण गराउँदै विदेशमन्त्री वाङले बेइजिङले आफ्नो छिमेकी कूटनीतिमा काठमाडौँसँगको सम्बन्धलाई सधैँ उच्च र महत्त्वपूर्ण स्थानमा राखेको बताउनुभयो। नेपालमा गठित नयाँ सरकारले जनताको व्यापक साथ र समर्थनसहित असल शासन  सञ्चालन गर्ने विश्वास व्यक्त गर्दै त्यसमा चीनको निरन्तर समर्थन रहने ढाडस समेत उहाँले दिनुभयो।

चीनद्वारा नेपालको ‘एक चीन नीति’ प्रतिबद्धताको प्रशंसा

भेटका क्रममा चिनियाँ पक्षले नेपालको तर्फबाट व्यक्त हुँदै आएको ‘एक चीन नीति’ प्रतिको दृढ प्रतिबद्धताको उच्च प्रशंसा गरेको छ। नेपालमा चीनका मूल चासोका विषयहरू विशेष गरी ताइवान र तिब्बतसम्बन्धी मुद्दाहरूमा नेपालले देखाउँदै आएको स्पष्ट, दृढ र अविचलित समर्थनप्रति चिनियाँ विदेशमन्त्रीले विशेष धन्यवाद ज्ञापन गर्नुभयो।

व्यापार, लगानी र जनस्तरको सम्बन्ध विस्तारको आह्वान

दुवै देशबीच रहेका विभिन्न द्विपक्षीय सहयोग मञ्च र संयन्त्रहरूको अधिकतम र सदुपयोग गर्नुपर्नेमा दुवै पक्षले जोड दिएका छन्। व्यावहारिक सहकार्यलाई थप घनिभूत बनाउन र जनस्तरको (People-to-People) आदानप्रदान तथा सांस्कृतिक सम्बन्धलाई प्रवर्द्धन गर्न चिनियाँ विदेशमन्त्रीले आह्वान गर्नुभयो। यसका साथै, चिनियाँ कम्पनीहरूलाई नेपालका विभिन्न क्षेत्रमा लगानी बढाउन र व्यापार व्यवसाय विस्तार गर्नका लागि चीन सरकारले प्रोत्साहन गर्ने नीति लिएको समेत उहाँले स्पष्ट पार्नुभयो।

परराष्ट्रमन्त्री शिशिर खनालको यो चीन भ्रमण र चिनियाँ नेतृत्वसँगको उच्चस्तरीय संवादले आगामी दिनमा नेपाल-चीन सम्बन्धलाई नयाँ उचाइमा पुर्‍याउने र आर्थिक विकासका परियोजनाहरूलाई गति दिने अपेक्षा गरिएको छ।