By एभरेष्ट अन्लाईन खबर 
काठमाडौं । काठमाडौं महानगरपालिकाले गरिरहेको रानीपोखरीको पुनर्निर्माण रोकिएको छ । पुरातात्विक सम्पदा पुनर्निर्माणको सीमा मिच्न थालिएपछि पुनर्निर्माण कार्य रोकिएको हो ।
काठमाडौं महानगरपालिकाका मेयर विद्यासुन्दर शाक्यले रानीपोखरीमा पानी अड्याउनका लागि भन्दै पोखरीमा सिमेन्टेड (कंक्रिट) वाल उठाएपछि स्थानीय बासिन्दा, पुरातत्वविद् र सम्पदाप्रेमीहरुले विरोध जनाएका थिए ।
बिहीबार काठमाडौं महानगरपालिकामा मेयरको अध्यक्षतामा महानगरकी उपमेयर हरिप्रभा खड्गी, राष्ट्रिय पुनर्निर्माण प्राधिकरणका सचिव मधुसूदन अधिकारी र पुरातत्व विभागका महानिर्देशक भेषनारायण दाहालबीच भएको छलफलले १५ दिनभित्र रानीपोखरी पुनर्निर्माणको टुङ्गो लगाउने निर्णय गरेको छ ।
रानीपोखरीलाई प्रताप मल्लकालीन शैली, स्वरुप र निर्माण सामग्री प्रयोग गरी पुनर्निर्माण गर्न १५ दिनभित्र सुझावसहितको प्रतिवेदन दिन एक विशेषज्ञ समिति गठन गर्ने निर्णय भएको उपमेयर खड्गीले जानकारी दिइन ।
उपमेयर खड्गीसमेत मेयर शाक्यले एकलौटीरुपमा रानीपोखरीको इतिहास समाप्त पार्न थालेको भन्दै बिरोधमा उत्रिएकी थिइन ।
