By एभरेष्ट अन्लाईन खबर 
बिबिसि । स्पेन सरकारले क्याटलोनियाको स्वतन्त्र अधिकारहरु आफ्नो हातमा लिंदै त्यहाँको सरकारमाथि नियन्त्रण गरेको छ । शुक्रबार क्याटलोनियाको क्षेत्रीय संसद्ले स्वतन्त्रताको घोषणा गरेलगत्तै मड्रिडले पछिल्लो कदम चालेको हो ।
एक औपचारिक सरकारी घोषणामा क्याटलान नेताहरुलाई बर्खास्त गरिएको र क्याटलोनियाको नियन्त्रण स्पेनकी उपप्रधानमन्त्री सोराया साइन्ज दे सन्तामारियालाई दिइएको जनाइएको छ ।
त्यसअघि स्पेनको आन्तरिक मन्त्रालयले क्याटलोनियाको प्रहरीका उच्च अधिकारीहरुलाई बर्खास्त गर्दै प्रहरी संगठनलाई आफ्नो नियन्त्रणमा लिएको थियो ।
शुक्रबार स्पेनी प्रधानमन्त्री मारिआनो राखोइले क्षेत्रीय संसद् भंग गर्दै क्याटलान नेताहरुलाई हटाइएको र समय अगावै चुनाव गर्ने घोषणा गरेका छन् । त्यसलगत्तै स्वतन्त्रताको पक्ष र विपक्षमा रातीसम्मै प्रदर्शनहरु भएका थिए ।
मड्रिडमा चाहिँ स्पेनी एकता र संविधानको लागि प्रदर्शन हुने कार्यक्रम छ । बार्सिलोनास्थित पृथकतावादीहरुले कुनै प्रदर्शनको आयोजना गरिसकेका छैनन् । क्याटलोनियाको एकपक्षीय देखिने स्वतन्त्र गणराज्य अन्तर्राष्ट्रिय समर्थन पाउन विफल देखिएको छ ।
