By एभरेष्ट अन्लाईन खबर 
काठमाडौं । प्रमुख निर्वाचन आयुक्त डा. अयोधिप्रसाद यादवले प्रधानमन्त्री शेरबहादुर देउवाले निर्वाचन आचारसंहिता उलंघन गरेपनि उनलाई कारवाही गर्न नसकेको स्वीकार गर्नुभएको छ ।
काठमाडौंमा आयोजित एक साक्षात्कारमा बोल्दै प्रमुख निर्वाचन आयुक्त यादवले आचारसंहिता उलंघन गरेपनि प्रधानमन्त्रीलाई कारवाही गर्न मिल्ने अवस्था नरहेको उल्लेख गर्नुभयो । यादवले निर्वाचन आचारसंहिता उलंघन गरेको विषयलाई लिएर आफू विवादमा आउन नचाहेको धारणा राख्नुभयो ।
निर्वाचन आचारसंहिता पालना गराउने निकाय आफैले उलंघन गर्नु हुन्न भन्ने मान्यतामा निर्वाचन आयोग रहेको भन्दै प्रमुख आयुक्त यादवले आयोगको सम्पूर्ण ध्यान निर्वाचनलाई सफल बनाउनमा केन्द्रीत भएको बताउनुभयो ।
छिटपुट रुपमा निर्वाचन आचारसंहिता उल्लंघन भएको पाइएपनि व्यापक उलंघन भएको भन्नु गलत भएको टिप्पणी गर्नुभयो ।
निर्वाचन आयोगले निर्वाचन आचारसंहिता उलंघन हुन नदिन आयुक्तहरुकै नेतृत्वमा अनुगमन टोली परिचालन गरेको छ ।
