By एभरेष्ट अन्लाईन खबर 
काठमाडौं । राष्ट्रिय धर्मसभा नेपालद्वारा आयोजित चतुर्थ पण्डित सम्मेलनले तीन वा पाँच दिने आशौच (मृत्यु संस्कार) को हल्ला फैलाउनेलाई बहिष्कार गर्ने निर्णय गरेको छ । देशभरका पण्डितहरु भेला गरेर आयोजना गरिएको सम्मेलनले दुइ दिनको छलफलपछि यो निष्कर्ष निकालेको हो ।
सम्मेलनले १५ बुँदे घोषणापत्र जारी गर्दै सनातन हिन्दू धर्मानुयायीहरुले अनुसरण गर्दै आएको धर्मशास्त्रीय परम्परागत प्रमाणिक मान्यता अनुसार नै जननाशौच र मरणाशौच बार्ने र त्यसमा हलचल नगर्ने निर्णय गरेको हो ।
त्यस्तै, सम्मेलनले सबै स्थानीय निकायमा सनातन धर्म संस्कृति सम्वन्धि काम गर्ने संगठन निर्माण गर्नका लागि एक एक जना पण्डितलाई संयोजक तोक्ने र त्यसका लागि बजेटको व्यवस्था गर्न सरकारलाई अनुरोध गर्ने निर्णय गरेको छ ।
सम्मेलनले देशभरका पुरोहित पण्डितहरुको तथ्यांक संकलन गर्ने र समाजमा र्पुयाएको योगदान झल्कने गरी पण्डित डाइरेक्टरी प्रकाशन गर्ने निर्णय पनि गरेको छ । त्यसैगरी सार्वजनिक स्थलमा कार्य गर्ने पण्डित पुरोहितहरुलाई परिचय पत्र वितरण गर्ने र आवश्यक प्रशिक्षणको व्यवस्था गर्ने निर्णय पनि सम्मेलनले गरेको छ ।
सम्मेलनले पण्डित आचार संहिता पनि बनाउने र त्यसको कडाइका साथ अनुगमन गर्ने निर्णय पनि गरेको छ । सनातन धर्म, संस्कार र संस्कृतिको मूल संस्कृत शिक्षा भएकाले त्यसको संरक्षणका लागि विद्यालयस्तरमा कम्तिमा एकपत्र संस्कृत विषय राख्न पहल गर्ने निर्णय गरेको छ ।
सम्मेलनले भूकम्पबाट क्षति भएका धार्मिक संरचनाहरुलाई पूर्ववत अवस्थामा ल्याउन सरकारको ध्यानकर्षण गराउने निर्णयसमेत गरेको छ ।
