By एभरेष्ट अन्लाईन खबर 
काठमाडौँ। राष्ट्रिय जनता पार्टी (राजपा)को महाधिवेशन आउँदो बैसाख ७ देखि ९ गतेसम्म हुने भएको छ । पार्टी केन्द्रीय कार्यालय बबरमहलमा असार ४ गतेदेखि बसेको तीन दिने राजनीतिक समितिले महाधिवेशनको मिति तय गरेको हो ।
बैठकले एक वर्षभित्र महाधिवेशन गर्नुपर्ने पार्टीको विधानको धारा २२ उपधारा १० लाई संशोधन गरिएको निर्णय निर्वाचन आयोगलाई पठाउने निर्णय समेत गरेको छ ।
साथै आउँदो २१ गते पुनः राजनीतिक समितिको बैठक बस्ने निर्णय भएको छ । बैठकले ३ सदस्यिय विधान परिमार्जन समिति गठन गर्ने निर्णय समेत गरेको छ ।
निर्वाचन आयोगले हालै मात्र असार मसान्तभित्र महाधिवशेन गर्न राजपालाई निर्देशन दिएको थियो । तर, राजपाले विधान संशोधन गरेर आगामी वैशाखमा मात्र महाधिवेशन गर्ने निर्णय गरेको हो ।
मधेस केन्द्रित ६ दल मिलेर गत वैशाखमा गठन भएको राजपा दल दर्ताका क्रममा निर्वाचन आयोगमा बुझाइएको विधानमा एक वर्षभित्र महाधिवेशन गर्ने उल्लेख थियो ।
