भलिबल क्लब च्याम्पियनसिपमा आर्मीको विजयी शुरुआत

२०७६ माघ ०३, काठमाडौं– पाँचौँ संस्करणको आरबीबी एनभिए राष्ट्रिय महिला तथा पुरुष भलिबल क्लब च्याम्पियनसिपमा नेपाली सेनाको त्रिभुवन आर्मी क्लबले विजयी शुरुआत गरेको छ । त्रिपुरेश्वरको राष्ट्रिय खेलकूद परिषद् (राखेप) को कभर्ड हलमा शुक्रबार दिउँसो भएको पुरुष भलिबलमा आर्मीले आरजे भलिबल ग्रुपलाई ३–० सेटले पराजित गरेको हो । आर्मीले आरजे गु्रपलाई २५–९, २५–१६ र २५–९ अङ्कले हरायो । जितसँगै आर्मीले २ अङ्क जोडेको छ ।

प्रतियोगितामा पुरुषतर्फ ११ तथा महिलातर्फ ७ टोलीको सहभागिता छ । महिलातर्फ शुक्रबार नै होङ्गवाञ्जी न्यू डायमण्ड क्लब र नेपाल पुलिस क्लबबीच प्रतिस्पर्धा हुने नेपाल भलिबल सङ्घका महासचिव जीतेन्द्रबहादुर चन्दले जानकारी दिए । पुरुष भलिबलमा सहभागी टोलीलाई चार समूहमा विभाजन गरिएको छ । चारै समूहको शीर्ष दुई टोली क्वाटरफाइनलमा प्रवेश गर्नेछन् ।