By एभरेष्ट अन्लाईन खबर 
काठमाडौँ, ३२ असार ।
सरकारले आगामी आर्थिक वर्ष २०८३/८४ को साउन १ गतेदेखि लागू हुने गरी विभिन्न क्षेत्रमा नयाँ कर तथा सेवा शुल्कका दरहरू थप गरेको छ । आम सर्वसाधारणको चासोका विषय मानिएका शैक्षिक क्षेत्र, स्वास्थ्य उपचार, घरजग्गा, सेयर बजार तथा विद्युत महसुल लगायतका क्षेत्रमा करको नयाँ दायरा निर्धारण गरिएको हो ।
नयाँ आर्थिक विधेयक तथा व्यवस्थाअनुसार आगामी साउन १ गतेदेखि लागू हुने मुख्य व्यवस्थाहरू यस प्रकार रहेका छन्:
१. शिक्षा र स्वास्थ्य क्षेत्रमा थप भार
आगामी साउनदेखि शैक्षिक कर र बिरामीको उपचार करमा समान ३ प्रतिशत थप गरिएको छ । यसले गर्दा उच्च शिक्षा तथा स्वास्थ्य सेवा थप खर्चिलो हुने देखिएको छ ।
२. गहना खरिद–बिक्री र विद्युत् महसुलमा परिमार्जन
गहना बिक्री गर्दा लाग्ने करमा ०.५ प्रतिशत थप गरिएको छ । त्यसैगरी ऊर्जा क्षेत्रमा ५० युनिटभन्दा बढी विद्युत खपत गर्ने गार्हस्थ्य उपभोक्ताका लागि ५ प्रतिशत थप कर लाग्ने व्यवस्था गरिएको छ । ठूला उद्योगीहरूको हकमा भने खपतका आधारमा १३ प्रतिशतसम्म कर लाग्ने गरी नयाँ विद्युत शुल्क निर्धारण गरिएको छ ।
३. राइड सेयरिङमा अतिरिक्त शुल्क 
सर्वसाधारणको लोकप्रिय यातायातको माध्यम बन्दै गएको इनड्राइभर, पठाओ जस्ता राइड सेयरिङ सेवामा ५ प्रतिशत थप सेवा शुल्क लाग्ने व्यवस्था गरिएको छ ।
४. सेयर बजारमा पुँजीगत लाभकरको नयाँ वर्गीकरण
सेयर बजारका लगानीकर्तालाई लक्षित गरी होल्डिङ अवधिका आधारमा पुँजीगत लाभकर निर्धारण गरिएको छ:
-
दीर्घकालीन लगानी (१ वर्षभन्दा बढी होल्ड गरेमा): पुँजीगत लाभकर ७.५ प्रतिशत लाग्नेछ ।
-
अल्पकालीन लगानी (१ वर्षभन्दा कम अवधिमा बिक्री गरेमा): पुँजीगत लाभकर १० प्रतिशत लाग्नेछ ।
५. घरजग्गा कारोबारमा कर परिमार्जन
घरजग्गा खरिद–बिक्री गर्दा लाग्ने पुँजीगत लाभकरमा पनि स्वामित्व अवधिको नयाँ नियम लागू गरिएको छ:
-
स्वामित्व अवधि ५ वर्ष वा सोभन्दा बढी भएमा ७.५ प्रतिशत पुँजीगत लाभकर लाग्नेछ ।
-
स्वामित्व अवधि ५ वर्षभन्दा कम भएमा १० प्रतिशत पुँजीगत लाभकर आकर्षित हुनेछ ।
सरकारले यी नयाँ करका दरहरूले राजस्व संकलनमा थप टेवा पुग्ने विश्वास लिएको छ भने सर्वसाधारण र व्यवसायीहरूले यसका दीर्घकालीन प्रभावबारे आ-आफ्ना विश्लेषण गरिरहेका छन् ।
थप समाचार र विस्तृत अपडेटका लागि हेर्दै गर्नुहोला: www.everestonlinekhabar.com
