टेलिकमको गुणस्तर सुधार्न सुशासन समितिको निर्देशन

काठमाडौं । संसदको सुशासन समितिले नेपाल टेलिकमको सेवाको गुणस्तर सुधार्न सरकारलाई निर्देशन दिएको छ । टेलिकमले जिम्मेवारी पूरा नगरेको भन्दै समितिले संस्थाको व्यवस्थापन सुधार्न पनि निर्देशन दिएको छ । टेलिकमको गुणस्तरप्रति लगातार जनस्तरबाट गुनासो आए पनि स्तरोन्नति नगरेकामा समितिले आपत्ति जनाएको छ ।

बैठकमा सञ्चार सचिव महेन्द्रमान गुरुङले टेलिकमको ल्याण्डलाईनभन्दा बढी मोवाइल सेवामा समस्या रहेको बताए । उनले टावरका कारण विशेष गरी पहाडी क्षेत्रमा समस्या भैरहेको बताए । टेलिकममा पुरानै प्रविधिमा काम भइरहेको भन्दै उनले अब नयाँ प्रविधि भित्र्याइने जानकारी पनि दिए । १ लाख ४७ हजार नयाँ प्रविधियुक्त ल्यान्डलाईन वितरणका लागि ललितपुरबाट काम शुरु भइसकेको र केही वर्षभित्रै देशका सबै भागमा पुर्याइने उनले बताए ।