By एभरेष्ट अन्लाईन खबर 
पोखरा। पुनरावेदन अदालत पोखराका सहन्यायधिवक्ता सुरेन्द्रबहादुर थापालाई ५ लाख रुपैयाँ घूस लिँदालिँदै अख्तियार दुरुपयोग अनुसन्धान आयोगले पक्राउ गरेको छ । आयोगको पोखरास्थित कार्यालयबाट खटिएको टोलीले उनलाई पक्राउ गरेको हो ।
ठगी मुद्दा सर्वोच्च अदालतमा पुनरावेदन नगरिदिने प्रलोभन देखाई सेवाग्राहीसँग घूस माग गरिरहेको भन्ने सूचना प्राप्त गरेपछि अनुसन्धानको लागि गएको अख्तियारको टोलीले थापालाई उनकै कार्यकक्षबाट नियन्त्रणमा लिएको अख्तियारद्वारा जारी विज्ञप्तिमा उल्लेख छ । अहिले थप अनुसन्धान भइरहेको अख्तियारले जनाएको छ ।
यस्तै, अख्तियारले मालपोत कार्यालय कास्कीमा कार्यरत मालपोत अधिकृत खेमनारायण पौडेल र खरिदार सञ्जय शर्मालाई पनि ५० हजार रुपैयाँ घूस लिँदालिँदैको अवस्थामा पक्राउ गरेको छ । जग्गा धितोबन्धक पास गर्ने सिलसिलामा सेवाग्राहीसँग घूस माग गरेको उजुरीका आधारमा अनुसन्धानको लागि गएको अख्तियारको टोलीले उनीहरुलाई नियन्त्रणमा लिएको हो ।
