By एभरेष्ट अन्लाईन खबर 
काठमाडौं । साफ च्याम्पियनसिप फुटबल खेल्न बंगलादेश पुगेको नेपाली टोली स्वदेश फर्किएको छ । सेमिफाइनल खेलमा माल्दिभ्ससँग पराजित भएपछि नेपाली टोली फाइनल खेल अगावै स्वदेश फर्किएको हो ।
नेपालले साफ च्याम्पियनसिपमा ४ खेल खेलेको थियो । समूह चरणको पहिलो पाकिस्तानसँगको खेलमा नेपाल २–१ गोल अन्तरले पराजित भएको थियो । दोस्रो र तेस्रो भुटान र बंगलादेशलाई क्रमशः ४–० र २–० गोल अन्तरले पराजित गर्दै नेपाली खेलाडीले टिमलाई लयमा फर्काएका थिए । तर, सेमिफाइनल खेलमा नेपाल माल्दिभ्सविरुद्ध ३–० गोल अन्तरले पराजित भएपछि टिम प्रतियोगिताबाट बाहिरिएको थियो ।
नेपाली राष्ट्रिय फुटबल टोलीका कार्यवाहक प्रशिक्षक बालगोपाल महर्जनले माल्दिभ्सविरुद्धको खेलमा धेरै गल्ती भएको बताए । उनले माल्दिभ्ससँगको खेलमा मौसम मुख्य चुनौतीका रुपमा देखिएको बताए ।
