आगामी वर्ष युएईमा हुने एएफसी एसिया कपको ‘ड्र’ सार्वजनिक

एजेन्सी ।आगामी वर्ष युएईमा हुने एएफसी एसियन कपको समूह विभाजन गरिएको छ। पहिलो पटक २४ टिमबीच प्रतिस्पर्धा हुन लागेको प्रतियोगितामा ६ समूहमा ४-४ टिम राखिएको छ।

 दुबईमा भएको ‘ड्र’ को  समूह एमा आयोजक युएई, बहराइन थाइल्यान्ड र भारत परेका छन्। समूह बीमा डिफेन्डिङ च्याम्पियन अस्ट्रेलिया जोर्डन, प्यालेस्टाइन र सिरिया समावेश छन्।  यस्तै समूह सीमा दक्षिण कोरिया,  चीन तथा पहिलो पटक सहभागी हुन लागेका किर्गिस्तान र फिलिपिन्स छन्।

समूह डीलाई ग्रुप अफ डेथ मानिएको छ। जहाँ तीन पटकको विजेता इरान र २००७ को च्याम्पियन इराक छन्। यस्तै यो समूहमा भियतनाम र यमन पनि परेका छन्।

समूह ई मा २ पटकको विजेता साउदी अरेबियासँगै सन् २०११ को आयोजक कतार र लेवनान छन्। यो समूहमा उत्तर कोरिया पनि छ।

एसिया कपको सवैभन्दा बढी चार पटक उपाधि जित्ने टिम जापान समूह एफ मा परेको छ। यो समूहमा उज्वेकिस्तान, ओमान र तुर्कमेनिस्तान पनि समावेश छन्।

एसियाको सर्वाधिक ठूलो प्रतियोगिता एसियन कपमा कुल १ करोड ४८ लाख डलरको पुरस्कार प्रदान गरिनेछ। प्रतियोगिता आगामी जनवारी ५ मा  सुरु भएर फेब्रुअरी १ मा समापन हुनेछ।