By एभरेष्ट अन्लाईन खबर 
काठमाडौं । स्थानीय तह निर्वाचनमा उत्कृष्ट नतिजा ल्याएको नेकपा एमाले मंसिरमा हुने प्रदेश र प्रतिनिधिसभा निर्वाचनमा बहुमत ल्याउने तयारीमा जुटेको छ । यसका लागि बिहीबार स्थायी कमिटी बैठकमा छलफल भएको छ भने शुक्रवारबाट केन्द्रीय समिति बैठक सुरु हुँदैछ ।
केन्द्रीय समिति बैठकबाट पार्टीका सबै निकायलाई परिचालन गर्ने तयारी एमालेले गरेको छ । बिहीबारको स्थायी कमिटी बैठकमा मंसिर १० र २१ गतेका लागि तय भएको निर्वाचनपछि केन्द्रीय र प्रदेशसभामा एमालेको बहुमतसहितको सरकार बनाउन सिँगो पार्टी लाग्ने विषयमा छलफल भएको सचिव योगेश भट्टराईले जानकारी दिनुभयो ।
शुक्रवारबाट सुरु हुने केन्द्रीय समिति बैठकमा प्रदेश नम्बर २ को निर्वाचन परिणामको पनि समीक्षा हुनेछ । म्तगणना गर्दागर्दै कर्मचारी फेर्ने, सुरक्षाकर्मी फेर्ने लगायतका काम भएको सुन्नमा आएकाले त्यसबारे पनि छलफल हुने भट्टराईले बताउनुभयो ।
