By एभरेष्ट अन्लाईन खबर 
महोत्तरी। नेकपा (माओवादी केन्द्र)का अध्यक्ष एवं पूर्व प्रधानमन्त्री पुष्पकमल दाहाल ‘प्रचण्ड’ले प्रदेश नम्बर–२ मा राष्ट्रिय जनता पार्टीसहितको चुनाव हुने दावी गर्नुभएको छ ।
महोत्तरीको बर्दिवासमा पत्रकारहरुसंग कुरा गर्दै अध्यक्ष दाहालले राजपाका माग पूरा हुने वातावरण बनिरहेकाले उनीहरुको चुनावमा भाग लिने सम्भावना पनि बढदै गएको बताउनुभयो ।
राजपाले अघि सारेका माग र शर्त पूरा हुने लगभग निश्चित भैसकेको उहाँले बताउनुभयो । उहाँले संविधान संशोधन, सीमांकन परिवर्तन तथा प्रदेश नं–२ मा स्थानीय तहको संख्या थप्ने गृहकार्य भैरहेको जानकारी पनि दिनुभयो ।
कार्यकर्ता प्रशिक्षण कार्यक्रमका लागि जनकपुर जाने क्रममा उहाँले बर्दिवासमा पत्रकारसँग कुरा गर्नुभएको हो । उहाँको साथमा नेता नारायणकाजी श्रेष्ठ र रामबहादुर थापा पनि संगै हुनुहुन्थ्यो ।
