चितवन, असार ७ गते ।

राष्ट्रिय स्वतन्त्र पार्टी (रास्वपा) को ऐतिहासिक प्रथम महाधिवेशन आजदेखि चितवनमा भव्य रूपमा सुरु हुँदैछ। महाधिवेशनको उद्घाटन सत्रमा सहभागी हुन देशका प्रमुख राजनीतिक दलका शीर्ष नेताहरू चितवन प्रस्थान गर्ने र शुभकामना दिने क्रम सुरु भएको छ।

प्रधानमन्त्री बालेन शाह चितवनमा

रास्वपा महाधिवेशनमा सहभागी हुनका लागि प्रधानमन्त्रीसमेत रहेका रास्वपा वरिष्ठ नेता बालेन शाह चितवन प्रस्थान गरिसकेका छन्। उनको उपस्थितिलाई महाधिवेशनको मुख्य आकर्षण र राजनीतिक वृत्तमा चासोका साथ हेरिएको छ।

दलका शीर्ष नेताहरूको उपस्थिति

रास्वपाले आफ्नो पहिलो महाधिवेशनमा विभिन्न राजनीतिक दलका शीर्ष नेताहरूलाई निमन्त्रणा गरेको थियो। प्राप्त जानकारी अनुसार उद्घाटन सत्रमा:

नेपाली कांग्रेसका सभापति गगन थापा विशेष अतिथिका रूपमा सहभागी हुँदैछन्।नेकपा एमालेका तर्फबाट नेता प्रदीप ज्ञवाली सहभागी हुनेछन्।नेकपा माओवादी केन्द्र (नेकपा) का तर्फबाट नेता वर्षमान पुन सहभागी हुने जनाइएको छ।राष्ट्रिय प्रजातन्त्र पार्टी (राप्रपा) का अध्यक्ष राजेन्द्र लिङ्देन पनि महाधिवेशनमा सहभागी हुने टुंगो लागेको छ।

कांग्रेस सभापति गगन थापा चितवन प्रस्थान, दिए शुभकामना

नेपाली कांग्रेसका सभापति गगन थापा आज बिहानै चितवन प्रस्थान गरेका छन्। उनका स्वकीय सचिव शंकर कुइँकेलका अनुसार सभापति थापा रास्वपा महाधिवेशन उद्घाटन समारोहमा सहभागी हुने निश्चित कार्यक्रम रहेको छ।

चितवन प्रस्थान गर्नुअघि आज बिहान सभापति थापाले राष्ट्रिय स्वतन्त्र पार्टी (रास्वपा) र त्यसका सभापति रवि लामिछानेलाई सामाजिक सञ्जालमार्फत बधाई तथा शुभकामना व्यक्त गरेका छन्। थापाले स्थापनाको छोटो अवधिमै रास्वपाले उल्लेखनीय जनसमर्थन प्राप्त गर्दै राष्ट्रिय राजनीतिमा आफूलाई बलियो रूपमा स्थापित गर्न सफल भएको उल्लेख गरेका छन्।

रास्वपा नेतृत्वको प्रशंसा गर्दै थापाले लेखेका छन्, “तपाईंको नेतृत्वमा संगठन निर्माणदेखि निर्वाचनसम्मको यो यात्रा प्रशंसनीय छ।” साथै, उनले रास्वपाको यस महाधिवेशनले स्पष्ट राजनीतिक विचार, बलियो संगठन र सुदृढ नीतिको मार्गचित्र कोर्न सफल होस् भन्ने कामना समेत गरेका छन्।

रास्वपाको यो प्रथम महाधिवेशनलाई नेपाली राजनीतिमा नयाँ शक्तिहरूको नीतिगत र सांगठनिक परिपक्वता मापन गर्ने महत्वपूर्ण कडीका रूपमा हेरिएको छ। महाधिवेशनको थप अपडेट एभरेष्ट अनलाइन खबरले निरन्तर प्रस्तुत गरिरहनेछ।