By एभरेष्ट अन्लाईन खबर 
एजेन्सी । पाकिस्तानका क्रिकेट प्रमुख नजाम सेथीले राजीनामा दिएका छन्। पूर्वक्रिकेटर समेत रहेका इमरान खान नयाँ प्रधानमन्त्रीमा निर्वाचित भएपछि क्रिकेट प्रमुख सेथीले राजीनामा दिएका हुन्।
पूर्वप्रधानमन्त्री नवाज शरीफको पक्षमा सन् २०१३ मा भएको निर्वाचनमा धाँधली गर्न सहयोग गरेको आरोप खानले सेथीलाई लगाएका थिए। सेथीलाई शरिफले पाकिस्तान क्रिकेट वोर्ड (पीसीबी) मा नियुक्त गरेका हुन्।
‘सहज तरिकाले काम गर्ने वातावरण नभएको र आफ्नो जिम्मेवारी पूरा गर्न गाह्रो हुने देखिएकाले मैले क्रिकेट बोर्डबाट राजीनामा दिने निर्णय गरेको हुँ,’ सेथीले ट्विटरमार्फत सार्वजनिक गरेको राजीनामापत्रमा उल्लेख छ।
प्रधानमन्त्री खानले सेथीको ठाउँमा अन्तर्राष्ट्रिय क्रिकेट परिषद्का पूर्वअध्यक्ष हसन मानीलाई नियुक्त गरिसकेका छन्।
