By एभरेष्ट अन्लाईन खबर 
एजेन्सी । फ्रेन्च लिग वान च्याम्पियन पेरीस सेन्ट जर्मेन (पिएसजी) ले घरेलु मैदानमा सिजनको पहिलो हार बेहोरेको छ । पिएसजी घरेलु मैदानमा रेनसँग २ – ० ले पराजित भएको हो ।
पार्क दि प्रिन्सेस स्टेडियममा पिएसजीलाई हार चखाउन बेन्जामिन बोरिगेओ र एड्रियन हुनोउले समान एक– एक गोल गरे । पाँच खेल अगावै लिगको उपाधि जितेको पिएसजी सन् २०१६ मार्च २० पछि पहिलो पटक घरेलु मैदानमा पराजित भएको हो । त्यसबेला पिएसजी मोनाकोसँग पराजित भएको थियो ।
पहिलो हाफ गोराहित बराबरीमा सकिएको खेलमा दोस्रो हाफमा रेनले दुवै गोल गरेको थियो । खेलको ५२ औं मिनेटमा बेन्जामिनले गोल गर्दै रेनलाई सुरुवाती अग्रता दिलाए । त्यसपछि खेलको ७१ औं मिनेटमा एड्रियनले गोल गर्दै रेनले पिएसजीलाई २ – ० को हार चखाएको हो ।
रेनसँग घरेलु मैदानमा पराजित भएपनि लिग लिडर पिएसजीको शीर्ष स्थानको अग्रता फराकिलो रहेको छ । पिएसजीले ३७ खेलबाट ९२ अंक जोडेको छ । लिगमा एक खेल बाँकी रहदा पिएसजीले दोस्रो स्थानको मोनाकोलाई १६ अंकले पछि बनाएको छ । मोनाकोको ७७ अंक छ । पिएसजीलाई हराउदै रेन लिगको पाँचौ स्थानमा उक्लिएको छ । रेनको ५७ अंक छ ।
