By एभरेष्ट अन्लाईन खबर 
बीबीसी । उत्तर कोरियाको थुनामा रहेका तीन जना अमेरिकी नागरिक रिहा भएका छन् । अमेरिकी विदेशमन्त्री माइक पोम्पेओको उत्तर कोरिया भ्रमणलगत्तै ती तीन अमेरिकी छुट्नसक्ने अनुमान गरिएको थियो । सोही बमोजिम नै उनीहरु रिहा भएका हुन् ।
उत्तर कोरियाली सरकारले ती अमेरिकीलाई रिहागर्ने तयारी गरेको थियो । कोरियाली अधिकारीहरूले अमेरिकी विदेशमन्त्रीको भ्रमणपछि छोड्ने जनाएका थिए । बिगत लामो समयदेखि उत्तर कोरिया र अमेरिकाले दुवै तर्फका नागरिकलाई आआफ्नो देशको भ्रमणमा रोक लगाउने गरेको भएपनि बर्सेनि ठूलो संख्याका अमेरिकी नागरिकले उत्तर कोरिया भ्रमण गर्ने गरेका थिए ।
उत्तर कोरियाली सरकारले जासुसको आरोप लगाएर थुनामा राखेका ती अमेरिकीलाई जेलमै राखेको थियो । पछिल्लो समयमा अमेरिका र उत्तर कोरियाबीचको सम्बन्धमा केही सुधार आउन थालेपछि भने ती अमेरिकी छुट्ने अपेक्षा गरिएको थियो ।
राष्ट्रपति ट्रम्पद्वारा स्वागत
यसैबीच उत्तर कोरियाद्वारा रिहा गरिएका तीन अमेरिकीलाई अमेरिकी राष्ट्रपति डोनाल्ड ट्रम्पले स्वागत गरेका छन् । बिहीबार वासिङ्टन डिसी पुगेका उनीहरुलाई राष्ट्रपति ट्रम्पले स्वागत गरेको बताइएको छ । उनीहरुलाई वासिङ्टन विमानस्थलमै पुगेर राष्ट्रपति ट्रम्पले स्वागत गरेका थिए । गतहप्ता मात्र अमेरिकी राष्ट्रपति डोनाल्ड ट्रम्पले उत्तर कोरियाली जेलमा रहेका अमेरिकी नागरिकलाई तत्कालै रिहा गर्न आग्रह गरेका थिए ।
अमेरिकी राष्ट्रपति डोनाल्ड ट्रम्प र उत्तर कोरियाली नेता किम जोङ उनबीच आगामी केही हप्तामा उच्चस्तरीय भेटवार्ताको तयारी भइरहेको छ । सोही अवसरमा उनीहरूलाई रिहा गर्न उनले माग गरेका हुन् । यसै उच्चस्तरीय भेटवार्ताको तयारीको लागि नै अमेरिकी विदेशमन्त्री पोम्पेओले उत्तर कोरियाको भ्रमण गरेका थिए । सो भ्रमणलाई अर्थपूर्ण रूपमा लिइएको छ ।
