By एभरेष्ट अन्लाईन खबर 
रूपन्देही । प्रदेश नम्बर ५ को सरकारले नीति तथा कार्यक्रम ल्याएको छ । प्रदेशप्रमुख उमाकान्त झाले आइतबार प्रदेशसभामा प्रदेश सरकारको नीति तथा कार्यक्रम प्रस्तुत् गरेका हुन ।
चालू आर्थिक वर्ष र आगामी वर्षको बजेट निर्माणअघि नीति तथा कार्यक्रम ल्याइएको हो । यही नीति तथा कार्यक्रममा रहेर प्रदेश सरकारले चालू आर्थिक वर्षका लागि १ अर्ब २ करोड ५ लाख रुपैयाँको बजेट यही चैत २९ गते संसदमा पेस गर्दैछ ।
प्रदेश सरकारले कृषिलाई उच्च प्राथमिकतामा राखेको छ । पर्यटन पूर्वाधार, दक्ष जनशक्तिको विकास तथा उद्योगहरुको स्थापना गर्ने सरकारको योजना छ ।
राष्ट्रिय गौरवका योजनादेखि स्थानीय तहमा सन्चालित योजनामा प्रदेश सरकारले मध्यस्तता गर्ने र समयमै आयोजना सम्पन्न गर्न निगरानी गर्ने उल्लेख छ ।
कृषि, उद्योग र पर्यटनका माध्यमबाट समग्र आर्थिक सामाजिक विकास गर्ने रणनीति अवलम्बन गर्ने पनि नीति तथा कार्यक्रममा उल्लेख रहेको छ । प्रदेशसभामा छलफलपछिमात्रै नीति कार्यक्रम पारित हुनेछ ।
