By एभरेष्ट अन्लाईन खबर 
काठमाडौं । काठमाडौंमा जारी इपिएल क्रिकेटमा विराटनगर वारिवर्सले लगातार चौथो जित निकालेको छ । शनिबार भएको खेलमा भैरहवा ग्लाडिएटर्सलाई ३५ रनले पराजित गर्दै विराटनगरले चौथो जित निकालेको हो ।
कीर्तिपुरस्थित मैदानमा विराटनगरले दिएको १५० रनको लक्ष्य पछ्याएको भैरहवाले १८ ओभर ३ बलमा अलआउट हुँदै ११४ रन मात्र जोड्न सक्यो । भैरहवाका लागि प्रदीप एरी र हरिशंकर साहले समान १८ – १८ रन जोडे । विराटनगरका अविनास कर्णले ४ तथा बसन्त रेग्मीले ३ विकेट लिए ।
यसअघि टस हारेर पहिले ब्याटिङ्ग गरेको विराटनगरले पुरै २० ओभर खेल्दै ६ विकेट गुमाएर १४९ रन बनाएको थियो । विराटनगरका लागि अंशुमान रथले ५७ रनको योगदान गरे । भैरहवाका हरिशंकर साहले ३ तथा आरिफ शेखले २ विकेट लिए ।
यो जितसँगै विराटनगर ४ खेलबाट ८ अंक जोडेर लिगको शीर्ष स्थानमा रहेको छ ।
