By एभरेष्ट अन्लाईन खबर 
काठमाण्डाैँ भदौ२० — मकवानपुर जिल्लाको हेटौंडा उपमहानगरपालिका–५ स्थित एक घरमा भएको भीषण आगलागीबाट करिब २ करोड रुपैयाँ बराबरको क्षति भएको छ। आगलागी नियन्त्रणको प्रयास गर्ने क्रममा घरधनी गम्भीर घाइते भएका छन्।
स्थानीय प्रहरीका अनुसार, बिहीबार बिहान करिब ३ बजे विद्युत सर्ट भएर सुरु भएको आगोले दुईतले पक्की घर पूर्ण रूपमा नष्ट भएको हो। आगोले घरभित्र रहेका सबै सम्पत्ति, गरगहना, लत्ताकपडा, विद्युतीय उपकरण र फर्निचर जलेर नष्ट भएका छन्।
घरधनी ५२ वर्षीय रामकृष्ण न्यौपाने आगो निभाउने प्रयास गर्दा घाइते भएका हुन्। उनलाई तत्काल हेटौंडा अस्पतालमा प्राथमिक उपचारपछि थप उपचारका लागि काठमाडौं रेफर गरिएको छ। डाक्टरका अनुसार उनको शरीरको केही भागमा गम्भीर रूपमा पोलेको छ।
आगलागी नियन्त्रणका लागि हेटौंडा उपमहानगरपालिकाको दमकल, नेपाली सेना, सशस्त्र प्रहरी, नेपाल प्रहरी र स्थानीयवासीको सहकार्यमा करिब दुई घण्टापछि मात्र आगो पूर्ण रूपमा नियन्त्रणमा ल्याइएको थियो।
प्रहरीले प्रारम्भिक अनुसन्धानबाट करिब २ करोड रुपैयाँ बराबरको क्षति भएको अनुमान गरेको छ भने घटनाबारे थप अनुसन्धान भइरहेको जनाएको छ।
