By एभरेष्ट अन्लाईन खबर 
काठमाडौं, भदौ १९ – नेपाल र अमेरिकाबीचको सैनिक सहकार्य थप सुदृढ हुने संकेतस्वरूप अमेरिकाले नेपाली सेनालाई एकवटा स्काई ट्रक (Sky Truck) विमान र एकवटा एयर एम्बुलेन्स हस्तान्तरण गरेको छ। एक समारोहबीच अमेरिकी दूतावासले यो सहयोग औपचारिक रूपमा नेपाली सेनालाई हस्तान्तरण गरेको हो।
उक्त उपकरणहरू प्राकृतिक विपद्, उद्धार कार्य, सैनिक आवागमन र स्वास्थ्य आपतकालीन परिस्थितिमा उपयोगी हुने सेनाले जनाएको छ।
स्काई ट्रक एक हल्का, बहुपरिचालनयुक्त फिक्स्ड विङ्ग विमान हो, जुन दुर्गम भेगमा सामान ढुवानी, सैनिक तैनाथी र उद्धार कार्यमा प्रयोग गर्न सकिन्छ। त्यसैगरी, एयर एम्बुलेन्सको प्रयोग घाइते सैनिक तथा नागरिकलाई छिटो अस्पताल पुर्याउनका लागि गरिनेछ।
नेपाली सेनाका प्रवक्ता महासेनानी कृष्णप्रसाद भण्डारीले भने, “यो सहयोग नेपाली सेनाको क्षमतामा थप वृद्धि गर्नेछ। विशेषगरी विपद् व्यवस्थापन र मानवीय उद्धारमा अमेरिकाको यो समर्थन अत्यन्तै महत्वपूर्ण छ।”
काठमाडौंस्थित अमेरिकी दूतावासले एक विज्ञप्ति जारी गर्दै भन्यो, “नेपाल–अमेरिका सम्बन्धको लामो इतिहासलाई अझ सुदृढ बनाउने उद्देश्यले यो सहयोग प्रदान गरिएको हो। क्षेत्रीय शान्ति, सुरक्षा र मानवीय सेवामा नेपाली सेनाको भूमिकाको उच्च सम्मान गर्दै अमेरिकाले प्राविधिक सहयोग निरन्तर जारी राख्नेछ।”
नियमित तालिम र मर्मतसम्भार पनि
अमेरिकाले विमानसहित त्यसको उड्डयन तालिम, मेकानिक प्रशिक्षण र मर्मतसम्भार उपकरणहरू पनि उपलब्ध गराएको छ। नेपाली सेनाका पाइलट र प्राविधिकहरूलाई प्रारम्भिक तालिम गत महिना सम्पन्न गरिएको थियो।
