By एभरेष्ट अन्लाईन खबर 
२०७६ पुस १८, काठमाडौँ । अर्थ मन्त्रालयका उपसचिव राजेन्द्र ढुङ्गानाविरुद्ध अख्तियार दुरुपयोग अनुसन्धान आयोगले चार करोड ६८ लाख ४८ हजार ५५६ रुपैयाँ ४५ पैसा बिगो कायम गरी भ्रष्टाचार मुद्दा दायर गरेको छ । सार्वजनिक पदमा रहेर अस्वाभाविक रुपमा सम्पत्ति आर्जन गरेको र सम्पत्तिको स्रोतसमेत खुल्न नसकेको भन्दै अख्तियारले उपसचिव ढुङ्गानाविरुद्ध शुक्रबार विशेष अदालतमा मुद्दा दायर गरेको हो । अख्तियारले मुद्दामा उनकी पत्नी मधु कोइराला (ढुङ्गाना)लाई पनि विपक्षी बनाएको छ । अनुसन्धानका क्रममा उपसचिव राजेन्द्रले चार करोड ६८ लाख ४८ हजार पाँच सय ५६ रुपैयाँ ४५ पैसा गैरकानूनी रुपमा आर्जन गरेको पाइएको अख्तियारको दावी छ ।
उनीविरुद्ध अख्तियारमा सार्वजनिक सेवाको पदमा बहाल रहँदा गैरकानूनी सम्पत्ति आर्जन गरेकोले छानबिन तथा अनुसन्धान गरी कारवाही गरी पाउँ भन्ने उजुरी परेपछि अख्तियारले छानविन थालेको थियो । अख्तियारका प्रवक्ता प्रदीपकुमार कोइरालाका अनुसार २०४९ साउन १९ देखि सार्वजनिक सेवामा प्रवेश गरेका राजेन्द्र ढुङ्गानाले २०७५ असार ३२ सम्म आर्जन गरेको वैध आय ७९ लाख ५४ हजार ७९५ रुपैयाँ ८ पैसाहुन आउँछ । उक्त आयको तुलनामा उनले सोही अवधिमा गरेको खर्च तथा लगानी ५ करोड ४८ लाख ३ हजार ३५१ रुपैयाँ ५३ पैसा रहेको अनुसन्धानबाट खुलेको छ । निजले गरेको खर्च तथा लगानीमध्ये ४ करोड ६८ लाख ४८ हजार ५५६ रुपैयाँ ४५ पैसाको स्रोत खुल्न नआएको हुँदा उनले सार्वजनिक सेवाको पदमा बहाल रहँदा गैरकानूनी सम्पत्ति आर्जन गरी अमिल्दो तथा अस्वाभाविक उच्च जीवनयापन गरेको पुष्टि हुन आएको अख्तियारको ठहर छ ।
उनले सार्वजनिक सेवाको पदमा रहेर आफ्नो पदको दुरुपयोग गरी भ्रष्टाचारजन्य कार्य गरी गैरकानूनी रुपमा आर्जन गरेको स्रोत नखुल्ने सम्पत्तिहरु निजले आफू लगायत श्रीमती मधु कोइराला (ढुङ्गाना) को नाममासमेत खरिद गरी राखेको देखिएको अख्तियारले जनाएको छ ।
