By एभरेष्ट अन्लाईन खबर 
एजेन्सी । स्मार्ट फोनको विश्व बजारमा आफूलाई स्थापित गरेको सामसुङले नयाँ फोन सामसुङ नोट नाइन ल्याउने तयारी गरेको छ । सामसुङको नयाँ फ्ल्यागसिप फोनका बारेमा विभिन्न आँकलन भइरहेका छन् । तर अब सामसुङ ग्यालेक्सी नोट नाइनको आधिकारिक तस्बिर सार्वजनिक भएको छ । सार्वजनिक भएको तस्बिर अनुसार ग्यालेक्सी नोट नाइनमा हेडफोनको ज्याक हुनेछ ।
ग्यालेक्सी नोट नाइनको तस्बिर सामसुङको वेब साइटमा भुलबस पोस्ट भएको हो । फोन सम्बन्धी जानकारी चुहावट गर्दै आएका इभान ब्लासले यो कुरा थाहा पाए । सामसुङले लगत्तै तस्बिर हटायो ।
फोनको पछाडिको भागको तस्बिर लिक भएको हो । नयाँ फोनमा एस–पेन स्टाइलस र यसको स्लट, युएसबी–सी कनेक्टर तथा हेडफोन ज्याक हुनेछ । यस्तै ड्युअल क्यामरा, फ्ल्यास तथा फिङ्गप्रिन्ट सेन्सर पनि प्रष्ट रुपमा देखिएको छ ।
यसअघि ग्यालेक्सी नोट नाइनको डिजाइन नोट एटको जस्तै हुने कुरा आएको थियो । लिक भएको तस्बिरले त्यो कुरा पुष्टि गरेको छ ।
