By एभरेष्ट अन्लाईन खबर 
काठमाडौं । नेकपा एमालेले मंगलबार राष्ट्रपतिको उम्मेदवार तय गर्ने भएको छ । फागुन २९ गते राष्ट्रपतिको निर्वाचन हुने भएपछि एमालेले आधिकारिक रुपमा आफनो उम्मेदवार तय गर्न लागेको हो ।
बामगठवन्धनको भागवण्डा अनुसार राष्ट्रपति एमालेको भागमा परेको छ । एमालेले स्थायी कमिटी बैठकमार्फत राष्ट्रपतिको उम्मेदवार छान्न लागेको हो । यसका लागि मंगलबार अपरान्ह ४ बजे प्रधानमन्त्री निवास बालुवाटारमा स्थायी कमिटी बैठक बोलाइएको छ ।
एमालेभित्र उम्मेदवार कसलाई बनाउने भन्ने विवाद छ । नेता माधव नेपाल समूहले बरिष्ठ नेता झलनाथ खनाललाई राष्ट्रपति बनाउने तर्क अघि सारेका छन् । स्थायी कमिटीमा उपाध्यक्ष बामदेव गौतम, भीम रावल, युवराज ज्ञवाली, उपमहासचिव घनश्याम भुषाल र सचिव योगेश भट्टराई खनालको पक्षमा देखिएका छन । उनीहरुले खनाल राजनीतिक सुझबुझ भएको, पूर्व प्रधानमन्त्री र पार्टीको अध्यक्षसमेत भैसकेको, अन्तर्राष्ट्रिय सम्बन्ध राम्रो भएको तथा राष्ट्रवादी नेता भएकाले राष्ट्रपतिमा उनको विकल्प खोज्न नहुने बताइरहेका छन ।
पार्टी अध्यक्ष तथा प्रधानमन्त्री केपी शर्मा ओलीले भने बहालवाला राष्ट्रपपति विद्या भण्डारीलाई दोर्होयाउन चाहेको बुझिएको छ ।
