By एभरेष्ट अन्लाईन खबर 
काठमाडौं, जेठ १ । आइतबार निर्वाचन भएका चारओटा महानगरपालिकामध्ये तीनओटामा मतगणना भइरहेकोमा तीनओटैमा नेकपा एमालेले अग्रता लिइरहेको छ ।
काठमाडौं, ललितपुर र पोखरा–लेखनाथ महानगरपालिकाको प्रारम्भिक परिणाममा एमाले अगाडि देखिएको हो ।
काठमाडौं महानगरपालिकाको प्रमुखमा एमालेका विद्यासुन्दर शाक्य ३५ मतसहित अग्रस्थानमा रहेका छन् । दोस्रो स्थानमा साझा पार्टीका किशोर थापाले २६ मत प्राप्त गरेका छन् भने तेस्रो स्थानमा विवेकशील पार्टीकी रञ्जु न्यौपाने (दर्शना)ले २५ मत पाएकी छन् । यस्तै, नेपाली कांग्रेसका उम्मेदवार राजुराज जोशीले २३ मत पाएका छन् । थापा र दर्शना भने स्वतन्त्ररुपमा उठेका हुन् ।
पोखरा–लेखनाथ महानगरपालिकाको सुरुआती नतिजामा प्रमुख पदमा एमाले उम्मेदवार मानबहादुर जीसी अग्रस्थानमा रहेका छन् । जीसीले १५५ मत प्राप्त गर्दा कांग्रेसका रामजी कुँवरले ८५ मत प्राप्त गरेका छन् ।
ललितपुर महानगरपालिकामा पनि प्रमुख पदमा एमाले उम्मेदवार अगाडि रहेका छन् । एमालेका हरिकृष्ण ब्यञ्जनकारले १३९३ मत प्राप्त गरेका छन् भने कांग्रेसका चिरीबाबु महर्जनले १२८५ मत प्राप्त गरेका छन् ।
चितवनको भरतपुर महानगरपालिकामा भने सोमबार साँझदेखि मतगणना सुरु भएको छ ।
