By एभरेष्ट अन्लाईन खबर 
काठमाडौँ । मधेश प्रदेशको राजनीतिमा प्रभावशाली भूमिका खेल्दै आएका दुई शक्ति, जनता समाजवादी पार्टी (जसपा), नेपाल र जनता समाजवादी पार्टीबीच औपचारिक रूपमा एकता भएको छ।
राजधानीमा आयोजित एक विशेष कार्यक्रमका बीच जसपा नेपालका अध्यक्ष उपेन्द्र यादव र जनता समाजवादी पार्टीका सह–अध्यक्ष रेणु यादवको नेतृत्वमा रहेका बहुमत केन्द्रीय सदस्यहरूले पार्टी एकताको घोषणा गरेका हुन्।
दुई पार्टीबीचको एकता पछि पार्टीको नाम ‘जनता समाजवादी पार्टी, नेपाल’ नै कायम गर्ने सहमति भएको छ। लामो समयदेखि अलग रहेका नेताहरू पुन: एकै ठाउँमा उभिएपछि जसपा नेपालभित्र नयाँ उत्साह थपिएको नेताहरूको दाबी छ।
एकताका मुख्य बुँदाहरू:
नेतृत्व: उपेन्द्र यादवको अध्यक्षता र रेणु यादवको समूहबाट आएका बहुमत सदस्यहरूको सहभागिता।
पार्टीको नाम: जनता समाजवादी पार्टी, नेपाल।
रेणु यादव पक्षका बहुमत केन्द्रीय सदस्यहरूको प्रवेशले उपेन्द्र यादव नेतृत्वको पार्टी थप शक्तिशाली बनेको छ।एकता कार्यक्रमलाई सम्बोधन गर्दै नेताहरूले यो मिलनले मधेश केन्द्रित राजनीतिलाई थप सुदृढ र संगठित बनाउने विश्वास व्यक्त गरेका छन्। अध्यक्ष उपेन्द्र यादवले फुटको राजनीतिले उत्पीडित समुदायको अधिकार प्राप्तिको आन्दोलन कमजोर हुने भएकाले एकता अपरिहार्य रहेको बताउनुभयो।
त्यसैगरी, सह–अध्यक्ष रेणु यादवले पार्टीलाई नयाँ उचाइमा पुर्याउन र पहिचानको मुद्दालाई सम्बोधन गराउन यो एकता कोसेढुङ्गा सावित हुने उल्लेख गर्नुभयो।
विगत केही समयदेखि टुटफुटको चपेटामा परेको जसपाका लागि यो एकतालाई राजनीतिक वृत्तमा महत्त्वका साथ हेरिएको छ।
