शोक प्रस्ताव पारित गर्दै प्रतिनिधिसभा बैठक स्थगित, चिकित्सा शिक्षा बिधेयक अघि बढन सकेन

काठमाडौं ।प्रतिनिधि सभाको बैठक पूर्व स्वास्थ्य राज्यमन्त्री मोहम्मद मुस्ताक आलमको निधनमा शोक प्रस्ताव पारित गर्दै सोमबारसम्मका लागि स्थगित भएको छ । संघीय संसद भवन नयाँ बानेश्वरमा बसेको प्रतिनिधि सभाको बैठकले आलमको निधनमा शोकप्रस्ताव सर्वसम्मतीले पारित गरेको हो ।

आलम २०७० सालमा तत्कालीन मधेशी जनअधिकार फोरम (लोकतान्त्रिक) बाट रौतहटको क्षेत्र नं.२ बाट संविधान सभा सदस्यमा निर्वाचित हुनुभएको थियो । आलमको गत शुक्रबार बाँसबारीस्थित शहीद गंगालाल राष्ट्रिय ह्ृदयरोग केन्द्रमा उपचारको क्रममा निधन भएको थियो ।  बैठक सुरु हुनु अघि सार्वजनिक गरिएको कार्यसूचीमा  शिक्षामन्त्री गिरिराजमणी पोखरेलले ‘चिकित्सा शिक्षा विधेयक २०७५’ र नेकपाकी सांसद विन्दा पाण्डेले संकल्प प्रस्ताव पेश गर्ने उल्लेख थियो ।

प्रतिनिधि सभाको अर्को बैठक सोमबार दिउँसो १ बजेका लागि बोलाइएको छ । यसैबीच सरकारले गत २२ गते राष्ट्रिय चिकित्सा शिक्षा विधेयक संसद सचिवालयमा दर्ता गराएपनि दलीय सहमति जुट्न नसक्दा टेबुल हुन सकेको छैन । चिकित्सा शिक्षा र सेवा सुधारको माग गर्दै लामो समयदेखि आन्दोलनरत प्रा. डा. गोविन्द केसीसँगको सहमति विपरित सरकारले विधेयक अगाडि बढाएको भन्दै प्रमुख प्रतिपक्षी कांग्रेसले विधेयक अगाडि बढ्न दिएको छैन । गत बिहीवार नै विधेयक टेबुल हुने कार्यसूची भएपनि सहमति जुट्न नसकेपछि अघि बढ्न सकेन ।