ब्रेकिङ: पूर्वमन्त्री दीपक खड्का पक्राउ, सम्पत्ति शुद्धीकरण र स्काउट जग्गा हिनामिनामा अनुसन्धान हुँदै

काठमाडौं, १५ चैत ।

केपी शर्मा ओली नेतृत्वको सरकारका पालामा ऊर्जामन्त्री रहेका नेपाली कांग्रेसका नेता दीपक खड्का पक्राउ परेका छन्। उनलाई आज (आइतबार) बिहान काठमाडौंको महाराजगन्जबाट प्रहरीको केन्द्रीय अनुसन्धान ब्युरो (सीआइबी) ले नियन्त्रणमा लिएको हो।

सीआइबीका एआइजी मनोज केसीका अनुसार खड्कामाथि सम्पत्ति शुद्धीकरण र अन्य विभिन्न गम्भीर आरोपमा अनुसन्धान गर्न पक्राउ गरिएको हो।

किन पक्राउ परे खड्का?

पूर्वमन्त्री खड्का पक्राउ पर्नुको पछाडि मुख्य तीनवटा कारणहरू देखिएका छन्:

विदेशी मुद्रा बरामद: केही समयअघि भएको ‘जेनजी’ (Gen Z) आन्दोलनका क्रममा खड्काको निवासमा आगजनी भएको थियो। सो क्रममा उनको घरबाट ठुलो मात्रामा नेपाली रुपैयाँका साथै कैयौँ देशका विदेशी मुद्राहरू फेला परेका थिए। सोही विदेशी मुद्राको स्रोत नखुलेपछि उनीमाथि सम्पत्ति शुद्धीकरणको मुद्दामा अनुसन्धान सुरु गरिएको थियो।

स्काउट जग्गा हिनामिना: खड्कामाथि नेपाल स्काउटको लैनचौरस्थित बहुमूल्य जग्गा र भवन कब्जा गरी हिनामिना गरेको गम्भीर आरोप समेत छ। यसअघि नै यो प्रकरणमा उनी विवादित बन्दै आएका थिए।

. सम्पत्ति शुद्धीकरण अनुसन्धान: सीआइबीले उनको नाममा रहेको सम्पत्तिको स्रोत र गैरकानूनी आर्जनका विषयमा विस्तृत छानबिन गरिरहेको छ।

महाराजगन्जबाट नियन्त्रणमा

आज बिहानै सीआइबीको टोलीले उनलाई महाराजगन्जस्थित निवास नजिकैबाट नियन्त्रणमा लिएको हो। पक्राउ परेका खड्कालाई अहिले सीआइबीको हिरासतमा राखिएको छ र थप कानुनी प्रक्रिया अगाडि बढाइएको प्रहरीले जनाएको छ।

राजनीतिक पहुँचका आधारमा सरकारी सम्पत्ति दुरुपयोग गरेको आरोप लागेका खड्काको गिरफ्तारीलाई पछिल्लो समयको भ्रष्टाचार विरोधी अभियानको एक महत्वपूर्ण कडीको रूपमा हेरिएको छ।

थप विवरणका लागि www.everestonlinekhabar.com हेर्दै गर्नुहोला।