By एभरेष्ट अन्लाईन खबर 
झापा, जेठ १ । अख्तियार दुरुपयोग अनुसन्धान आयोगले ६ लाख ८० रुपैयाँ घुस लिँदालिँदै नापी कार्यालय दमकका एक कर्मचारीलाई सोमबार पक्राउ गरेको छ ।
पक्राउपर्नेमा नापी कार्यालय दमकका सर्वेक्षक विनोदकुमार मण्डल रहेका छन् । उनलाई अख्तियार दुरुपयोग अनुसन्धान आयोग, इटहरीको टोलीले पक्राउ गरेको प्रहरी नायब उपरीक्षक रमेश बस्नेतले बताए ।
सेवाग्राहीको रु ३० हजारमा हुने कामका लागि उनले ६ लाख ८० रुपैयाँ रकम मागेपछि पक्राउ गरिएको बस्नेतले बताए ।
मण्डललाई सोमबार दिउँसो अख्तियारको टोलीले उनकै कार्यकक्षबाट रंगेहात पक्राउ गरेको हो ।
दमकका एक जग्गा व्यवसायीको प्लटिङको जग्गाको काम मिलाइदिने भन्दै घुस लिँदालिँदै उनलाई पक्राउ गरेको बताइएको छ ।
