जेनजी आन्दोलन जाँचबुझ आयोग भन्छ- अरुका राहदानी रोक्का र स्थानहद पनि जारी हुनसक्छ

काठमाडौं । सरकारद्वारा गठित भदौ २३–२४ को घटना सम्बन्धी जाँचबुझ आयोगले थप केही व्यक्तिको राहदानी रोक्का र स्थानहद जारी हुनसक्ने जनाएको छ । तर, अहिल्यै प्रहरीलाई कसैको घरमा छापा मार्न वा अनुसन्धान गर्न नभनेको जनाएको छ ।

आइतबार प्रहरीले कांग्रेस सभापति शेरबहादुर देउवाको सालो भूषण राणाको जावलाखेलस्थित घरसहित केही व्यक्तिका घरको खानतलासी लिएपछि जाँचबुझ आयोगको निर्देशन भनी चलेको हल्ला पूर्णतः निराधार भएको आयोगका सदस्य तथा नेपाल प्रहरीका भूपू एआईजी विज्ञानराज शर्माले बताए ।

‘प्रहरीले आफ्नो नियमित काम गर्नका लागि हाम्रो निर्देशन चाहिँदैन, त्यसमाथि भदौ २३–२४ को घटनासँग सम्बन्धित व्यक्ति र घटनाबाहेकका विषयमा हामीले केही भन्ने कुरा हुँदैन’, उनले भने ।