काठमाडौँ, २७ जेठ ।

नेपाली कांग्रेसभित्र आन्तरिक लोकतन्त्र, विधि र पद्धतिको बहस फेरि सडक र सदनबाट युवा तहमा सरेको छ। पार्टीभित्र पछिल्लो समय संस्थापन इतर पक्ष र युवा नेताहरू जुर्मुराउन थालेका छन्। यसै क्रममा नेपाली कांग्रेसका युवा नेताहरूले ५ बुँदे स्पष्ट एजेन्डासहित आगामी जेठ ३० गते काठमाडौँको सुकेधारामा ‘बृहत् युवा भेला’को आयोजना गर्ने भएका छन्।

पार्टीभित्र मौलाउँदै गएको गुटबन्दी, अपारदर्शी निर्णय प्रक्रिया र विधि मिचेर गरिएका नियुक्तिहरूविरुद्ध आवाज बुलन्द गर्न यो भेलाको आह्वान गरिएको आयोजक पक्षले जनाएको छ।

के हुन् युवा भेलाका ५ मुख्य एजेन्डा?

सुकेधारामा हुने भनिएको उक्त बृहत् भेलाका लागि युवा नेताहरूले मुख्य रूपमा ५ वटा एजेन्डाहरू तय गरेका छन्, जसले पार्टीको नेतृत्व तहलाई गम्भीर दबाब दिने निश्चित छ:

१. फर्जी विशेष महाधिवेशनबाट गठित समितिको खारेजी: विधान विपरीत र फर्जी प्रक्रियाबाट बनाइएका भनिएका विशेष महाधिवेशनका समितिहरूलाई तत्काल खारेज गर्नुपर्ने।

२. भातृ संस्थामा ‘टीके प्रथा’को अन्त्य: नेविसंघ, तरुण दल लगायतका विभिन्न भ्रातृ एवं शुभेच्छुक संस्थाहरूमा गरिएको भनिएको खल्तीका मान्छे राख्ने (टीके नियुक्ति) को पूर्ण खारेजी।

३. निर्वाचन समितिमार्फत अधिवेशनको ग्यारेन्टी: सबै भ्रातृ संस्थाहरूको तदर्थवाद अन्त्य गरी तत्काल स्वतन्त्र निर्वाचन समितिमार्फत विधिवत अधिवेशन सम्पन्न गरिनुपर्ने।

४. पार्टीमा विधिको शासन र आन्तरिक लोकतन्त्र: निर्णय प्रक्रियामा युवाहरूको अर्थपूर्ण सहभागिता र विधानको अक्षरशः पालना।

५. सङ्गठन सुदृढीकरण र आगामी रणनीति: आगामी निर्वाचन र पार्टीको भविष्यलाई ध्यानमा राख्दै युवा पुस्ताले खेल्नुपर्ने वैचारिक नेतृत्वको खोजी।

देउवा र कोइराला निकट युवाहरूको ‘दुर्लभ’ मोर्चाबन्दी

यस भेलाको सबैभन्दा चासो र राजनीतिक महत्त्वको विषय भनेको यसमा देखिन लागेको सहभागिता हो। पार्टीभित्र फरक-फरक कित्तामा देखिने गरेका निवर्तमान सभापति शेरबहादुर देउवा र प्रभावशाली नेता डा. शेखर कोइराला निकट मानिएका युवा नेता तथा कार्यकर्ताहरू यो भेलामा एकै ठाउँमा उभिने भएका छन्।

पार्टीको संस्थापन इतर समूहका युवाहरूले नेतृत्व गरेको भए पनि यो भेलामा देउवा पक्षकै असन्तुष्ट र रूपान्तरण चाहने युवाहरूको समेत बलियो साथ रहने बुझिएको छ। जसले गर्दा सुकेधाराको भेला केवल औपचारिकतामा मात्र सीमित नभई नेपाली कांग्रेसको राजनीतिमा नयाँ तरङ्ग ल्याउने आकलन गर्न थालिएको छ।

“पार्टी कसैको इच्छाले मात्र चल्न सक्दैन, विधान र विधिले चल्नुपर्छ। भ्रातृ संस्थाहरूलाई पङ्गु बनाउने र टीके प्रथा चलाउने काम बन्द नभएसम्म युवाहरू चुप लागेर बस्दैनन्,” भेला तयारीमा जुटेका एक युवा नेताले एभरेस्ट अनलाइन खबरसँग कुरा गर्दै भने।

जेठ ३० गते सुकेधारामा हुने यो ‘बृहत् युवा भेला’ले नेपाली कांग्रेसको आगामी राजनीतिक दिशा र नेतृत्वलाई कस्तो दबाब दिनेछ, त्यो भने हेर्न बाँकी नै छ। तर, युवाहरूको यो मोर्चाबन्दीले केन्द्रीय नेतृत्वलाई सच्चिनका लागि बलियो सन्देश भने पक्कै दिने देखिन्!