By एभरेष्ट अन्लाईन खबर 
कोरोना भाईरस अर्थात् कोभिड १९ को त्रासमा विश्व नै आजित बनिरहेका बेला छिमेकी मुलुक भारतले पनि कोरोना भाइरसको महामारी रोक्न भन्दै कठोर कदम चालेको छ । यात्रा निर्देशिका अनुसार, भारत सरकारले अब मार्च १३ अर्थात् भोलि शुक्रबार मध्याह्न १२ बजेपछि भारतमा विदेशीलाई प्रवेश दिइने छैन । कोरोना भाइरस नियन्त्रणका लागि भन्दै विभिन्न देशले विभिन्न देशमा आवतजावतमा रोक लगाइरहेका बेला छिमेकी मुलुक भारतले भने विश्वका कुनै पनि मुलुकका नागरिकलाई आफ्नो देश प्रवेशमा प्रतिबन्ध लगाएको हो । उसले विदेशमा रहेका आफ्ना नागरिकलाई समेत भोलि (शुक्रबार)देखि मुलुक छिर्न नदिने घोषणा गरेको हो । कोरोनाभाइरस प्रकोपले महामारी रूप लिएपछि उक्त कठोर कदम उठाइएको भारतले जनाएको छ । बीबीसी हिन्दीका अनुसार बुधबार भारतका शीर्ष मन्त्रीहरूको बैठकपछि उक्त ‘यात्रा निर्दे्शिका’ जारी गरिएको हो ।
