By एभरेष्ट अन्लाईन खबर 
काठमाडौँ। वैकल्पिक राजनीतिको प्रयासमा रहेको विवेकशील साझा पार्टी आज राष्ट्रिय स्वतन्त्र पार्टी (रास्वपा) मा औपचारिक रूपमा विलय हुँदैछ। दुई दलबीच एकताको घोषणासभा आज (आइतबार) दिउँसो २ बजे राष्ट्रिय सभागृह, प्रदर्शनीमार्गमा आयोजना हुँदैछ।
रास्वपाका प्रवक्ता मनिष झाले उक्त एकता घोषणासभाको जानकारी दिएका छन्। यो एकीकरणले नेपालको वैकल्पिक राजनीतिक धारमा बृहत्तर ध्रुवीकरणको सन्देश दिएको छ।
एकताको पृष्ठभूमि
विवेकशील साझा पार्टीको केन्द्रीय समितिको बैठकले गत बुधबार (मंसिर १० गते) रास्वपासँग एकीकरण गर्ने निर्णयलाई सर्वसम्मत अनुमोदन गरेको थियो।
पार्टीका उपाध्यक्ष एवं संवाद समितिका संयोजक प्रकाशचन्द्र परियारको वैकल्पिक राजनीतिक दलबीचको बृहत्तर ध्रुवीकरण/एकीकरण प्रस्तावलाई बैठकले पारित गरेको थियो।
विवेकशील साझाकी अध्यक्ष समीक्षा बाँस्कोटा र अर्का नेता रञ्जु दर्शनाका अनुसार रास्वपाको नाम, नेतृत्व र चुनाव चिह्न लाई निसर्त स्वीकार गर्दै एकताको घोषणा हुन लागेको हो।
विवेकशील साझाले वैकल्पिक राजनीतिक शक्तिको अपरिहार्यता महसुस गरी रास्वपासँग नि:सर्त एकता गर्ने निर्णय लिएको बताइएको छ।
कार्यक्रम विवरण
कार्यक्रम विवेकशील साझा पार्टी र राष्ट्रिय स्वतन्त्र पार्टीबीच एकता घोषणासभा
मिति आज (आइतबार)
समय दिउँसो २ बजे
स्थान राष्ट्रिय सभागृह, प्रदर्शनीमार्ग, काठमाडौँ
यस एकताले वैकल्पिक राजनीतिक शक्तिलाई थप बलियो बनाउने विश्वास लिइएको छ।
