By एभरेष्ट अन्लाईन खबर 
अपडेटः काठमाडौं, वैशाख ९ । सत्तारुढ र मधेसकेन्द्रित दलहरुबीच नयाँ संविधान संशोधन प्रस्तावलाई परिमार्जनसहित आइतबार (भोलि) व्यवस्थापिका–संसदमा दर्ता गरी पारित गरेर निर्वाचनमा जाने सहमति भएको छ । –
शनिबार साँझ प्रधानमन्त्रीको सरकारी निवास बालुवाटारमा भएको सत्तासाझेदार प्रमुख दलका शीर्ष नेता र आन्दोलनरत् मधेसकेन्द्रित दलका शीर्ष नेताहरुको बैठकले संविधान संशोधन प्रस्ताव परिमार्जनसहित पारित गरी स्थानीय तहको निर्वाचनमा सबै दलहरु सहभागी हुने सहमति भएको मन्त्री रमेश लेखकले जानकारी दिए ।
बैठकमा निर्वाचन दुई चरणमा गर्ने सहमति भएको बैठकमा सहभागी नेताहरुले बताएका छन् ।
पहिलो चरणको निर्वाचन वैशाख ३१ गते नै गर्ने र केही ठाउँहरुमा जेठ अन्तिम साता निर्वाचन गर्ने सहमति भएको नेताहरुले बताएका छन् ।
योसँगै मधेसकेन्द्रित दलहरुले घोषणा गरेको आन्दोलनसमेत स्थगन हुने भएको छ ।
आइतबार परिमार्जनसहित संविधान संशोधन प्रस्ताव पारित हुने र आइतबार नै मोर्चाले आन्दोलन फिर्ताको औपचारिक घोषणा गर्ने मधेसी मोर्चाका नेता लक्ष्मणलाल कर्णले जानकारी दिए ।
आइतबार मन्त्रिपरिषदको बैठक बसेर संविधान संशोधन प्रस्तावलाई परिमार्जन गर्ने नेताहरुले बताएका छन् ।
