By एभरेष्ट अन्लाईन खबर 
काठमाडौँ । प्रतिनिधिसभा निर्वाचनमा अपेक्षित परिणाम हात पार्न नसकी इतिहासकै चुनौतीपूर्ण पराजय व्यहोरेपछि नेकपा (एमाले) भित्र नयाँ नेतृत्वको बहसले औपचारिक प्रवेश पाएको छ। पार्टीभित्र ‘शक्तिशाली’ अध्यक्ष केपी शर्मा ओलीको विकल्पबारे मौन रहेका नेताहरू अहिले आन्तरिक छलफलमा जुटेका छन्।
विशेषगरी, अध्यक्ष ओलीलाई १० औँ महाधिवेशनमार्फत तेस्रोपटक नेतृत्वमा स्थापित गर्न निर्णायक भूमिका खेलेका उपाध्यक्ष विष्णु पौडेल अहिले नेतृत्व परिवर्तनको ‘सूलह’ (मध्यस्थता) मा सक्रिय देखिएका छन्।
निर्वाचन परिणामपछिको दबाब
निर्वाचनमा पार्टी दोस्रो शक्तिमा खुम्चिएपछि कार्यकर्ता पंक्तिमा निराशा छाएको र युवा पुस्तामा नेतृत्व हस्तान्तरणको माग चर्किएको छ। एमाले स्रोतका अनुसार, पार्टीलाई थप क्षति हुनबाट जोगाउन र आगामी निर्वाचनसम्म नयाँ ऊर्जा भर्नका लागि नेतृत्व तहमा हेरफेर अपरिहार्य रहेको निष्कर्षमा केही प्रभावशाली नेताहरू पुगेका हुन्।
विष्णु पौडेलको रणनीतिक सक्रियता ………
पार्टीभित्र ‘संकटमोचक’ र ‘कुशल व्यवस्थापक’ को छवि बनाएका पौडेलले अध्यक्ष ओली र अन्य असन्तुष्ट पक्षबीच सहमतिको वातावरण बनाउन पहल थालेका छन्। उनले निम्न बुँदाहरूमा केन्द्रित रहेर छलफल चलाइरहेको बुझिएको छ:
सम्मानजनक बहिर्गमन, अध्यक्ष ओलीलाई ‘अभिभावकीय’ भूमिकामा राखेर कार्यकारी पद हस्तान्तरण गर्ने।
पुस्तान्तरणको सन्तुलन,पुराना नेताहरूको अनुभव र नयाँ पुस्ताको जोशलाई समेट्ने गरी नयाँ समीकरण बनाउने।
पार्टी एकता,आन्तरिक गुटबन्दी अन्त्य गरी एकढिक्का एमाले निर्माण गर्ने।
“निर्वाचनको नतिजाले हामीलाई गम्भीर आत्मसमीक्षा गर्न बाध्य पारेको छ। पार्टीको भविष्यका लागि नेतृत्वमा गतिशीलता र संरचनामा परिवर्तन आवश्यक देखिएको छ,” एमालेका एक उच्च नेताले बताए।
ओलीसँगको संवाद र भावी दिशा
अहिलेसम्म अध्यक्ष ओलीले यसबारे सार्वजनिक रूपमा कुनै टिप्पणी गरेका छैनन्। तर, आफ्नै विश्वासपात्र पौडेलले नेतृत्व परिवर्तनको प्रक्रिया अघि बढाएपछि बालकोटमा सरगर्मी बढेको छ। यदि यो सहमति सफल भएमा एमालेमा दशकौँपछिको ठूलो राजनीतिक संक्रमण शान्तिपूर्ण रूपमा टुङ्गिने अनुमान गरिएको छ।
