By एभरेष्ट अन्लाईन खबर 
काठमाडौं । बलात्कारपछि हत्या गरिएकी कञ्चनपुरकी १३ वर्षिया बालिका निर्मला पन्तका हत्यारालाई कारवाहीको माग गर्दै काठमाडौंमा प्रदर्शन गरिएको छ । मानवअधिकारकर्मी, नागरिक समाजका प्रतिनिधी तथा सर्वसाधारण नागरिक प्रदर्शनमा सहभागी भए ।
प्रदर्शनमा सहभागीले तत्काल दोषी पत्ता लगाएर कारबाही गर्न माग गरेका छन् । सरकारले अपराधीलाई संरक्षण गरेको प्रदर्शनमा सहभागीको आरोप छ ।
प्रदर्शनमा सहभागी विवेकसाझा पार्टीकी रञ्जु दर्शना र नयाँ शक्ति पार्टीकी नेतृ हिसिला यमीकी छोरी मानषु भट्टराईले गृहमन्त्री रामबहादुर थापाले तत्काल राजीनामा दिन माग गरे ।
प्रदर्शनकारीले माइतीघरमण्डलादेखि नयाँ बानेश्वरसम्म नाराबाजी गर्दै जुलुस गरेका थिए ।
