By एभरेष्ट अन्लाईन खबर 
काठमाडौं ।नेपाली क्रिकेट टोली आइसिसी ट्वान्टी–ट्वान्टी विश्वकप छनोटअन्तर्गत एसिया पूर्वी क्षेत्रको छनोट प्रतियोगिताका लागि मलेसिया प्रस्थान गरेको छ । पारस खड्काको कप्तानी र जगत टमाटाको मुख्य प्रशिक्षणमा रहेकोे १४ सदस्यीय नेपाली टोली मालिन्डो एयरबाट मलेसिया गएको हो ।
आक्रामक ब्याट्सम्यान प्रदीप ऐरीले तीन वर्षपछि पुनरागमन गरेको नेपाली टोलीले बुधबार प्रतियोगिताको पहिलो खेलमा म्यानमारसँग प्रतिस्पर्धा गर्नेछ । प्रतियोगितामा आयोजक मलेसियासहित ७ टोलीको सहभागिता रहेको छ । प्रतियोगितामा मलेसिया, नेपाल, चीन, थाइल्यान्ड, म्यानमार, सिंगापुर र भुटानले राउन्ड रोविन लिगका आधारमा खेल्नेछन् । नेपाली टोलीमा कप्तान पारससँगै उपकप्तान ज्ञानेन्द्र मल्ल, वसन्त रेग्मी, विनोद भण्डारी, सोमपाल कामी, प्रदिप ऐरी, शरद भेषावकर, अनिलकुमार शाह, दीपेन्द्रसिंह ऐरी, आरीफ शेख, सन्दीप लामिछाने, करण केसी, ललितसिंह भण्डारी र ललितनारायण राजवंशी रहेका छन् । यस्तै, वैकल्पिक खेलाडीमा सुनिल धमला, सागर पुन, शाहब आलम र दिपेश श्रेष्ठ छन् ।
नेपालको खेल तालिका
असोज १६ गते म्यानमारविरुद्ध
असोज २० गते मलेसियाविरुद्ध
असोज २१ गते थाइल्यान्डविरुद्ध
असोज २३ गते भुटानविरुद्ध
असोज २४ गते चीनविरुद्ध
असोज २६ गते सिंगापुरविरुद्ध
