By एभरेष्ट अन्लाईन खबर 
काठमाडौँ, भदौ १९ — नेपाल प्रहरीका नवनियुक्त महानिरीक्षक (आईजीपी) चन्द्रकुवेर खापुङलाई आज गृह मन्त्रालयमा आयोजित विशेष समारोहका बीच दर्ज्यानी चिन्ह प्रदान गरिएको छ।
समारोहमा गृह सचिव गोकर्णमणि दुवाडीले खापुङलाई नेपाल प्रहरीको महानिरीक्षक पदको चिन्ह (दर्ज्यानी चिन्ह) तथा फूलमाला लगाई सम्मान गरेका हुन्। समारोहमा मन्त्रालयका उच्चपदस्थ अधिकारीहरू, प्रहरी संगठनका वरिष्ठ अधिकृतहरू तथा सञ्चारकर्मीहरूको उपस्थिति रहेको थियो।
सरकारले भदौ १८ गते बसेको मन्त्रिपरिषद् बैठकबाट खापुङलाई नेपाल प्रहरीको ३२औँ महानिरीक्षकमा नियुक्त गर्ने निर्णय गरेको थियो। खापुङले तत्कालीन आईजीपी दिपक थापाको सेवानिवृत्तिसँगै जिम्मेवारी सम्हालेका हुन्।
दर्ज्यानी चिन्ह प्राप्त गरेपछि संक्षिप्त प्रतिक्रिया दिँदै महानिरीक्षक खापुङले नेपाल प्रहरीलाई थप जिम्मेवार, जनमैत्री र प्रभावकारी बनाउने आफ्नो प्रतिबद्धता व्यक्त गरे। उनले विधिको शासन, मानव अधिकार र पेशागत उत्तरदायित्वप्रति संगठनलाई अझै सशक्त बनाउने बताए।
खापुङ प्रहरी सेवामा तीन दशकभन्दा लामो अनुभव बोकेका अधिकृत हुन्। उनले संगठनका विभिन्न तहमा जिम्मेवारी सम्हाल्दै उत्कृष्ट नेतृत्व क्षमता प्रदर्शन गर्दै आएका छन्।
