By एभरेष्ट अन्लाईन खबर 
बीबीसी । युक्रेनको उत्तरी भेगमा रहेको एक सैनिक हतियार भण्डारमा भएको बिस्फोट र आगलागीका कारण झण्डै १० हजार स्थानीयबासीलाई सुरक्षितस्थलमा सारिएको छ । स्थानीय अधिकारीहरुले राजधानी कीभबाट करिब १७० किलोमिटर उत्तर इचन्या सहर नजिक भएको उक्त दुर्घटनाबाट कसैको मृत्यु वा घाइते भएको विवरण भने प्राप्त नभएको जनाएका छन् ।
युक्रेनी प्रधानमन्त्री भोलोडीमीर ग्रोइस्म्यानले ट्वीट गर्दै आफू उक्त क्षेत्रको भ्रमणमा जान लागेको र आपतकालीन उद्धारका कार्यहरु शुरु भइसकेको बताएका छन् ।
सेनाको हतियार भण्डारमा आगलागी र बिस्फोट भएको, तथा यो करिब सात सय हेक्टरमा फैलिएको थियो । जोखिममा रहेका करिब १० हजार मानिसलाई अन्यन्त्र सार्नुपरेको अधिकारीहरुले बताएका छन् ।
युक्रेनी सैनिक हातहतियार भण्डारमा तीन वर्षको अवधिमा भएको यो छैटौं ठूलो आगलागी हो । सन् २०१७ मार्चमा पनि पूर्वी युक्रेनको बालाक्लीया सहरमा रहेको सैनिक हतियार भण्डारमा बिस्फोट र आगलागी भएको थियो ।
