By एभरेष्ट अन्लाईन खबर 
काठमाडौं । सत्तारुढ दल नेपाल कम्युनिष्ट पार्टी ( नेकपा) भित्रको विवाद संस्थागत भएको छ । पार्टीका वरिष्ठ नेता माधव नेपालले औपचारिकरुपमै असन्तुष्टि पत्र सचिवालयमा दर्ता गराएपछि विवाद संस्थागत भएको हो । सोमबार विवाद समाधानका लागि बैठक बोलाइएपनि त्यसले निकास नभई झन विवाद बढाएको छ ।
पार्टी सचिवालयको बैठकमा नेता नेपालले असन्तुष्टि पेश गरेपछि उनको पत्र एजेन्डामा राखिएको अर्का वरिष्ठ नेता झलनाथ खनालले जानकारी दिए । “उहाँले पत्र ल्याउनुभएको रहेछ,” खनालले भने, “उहाँको पत्र बैठकको कार्यसूचीमा राखिएको छ।”
खनालका अनुसार नेपालले प्रदेश कार्यविभाजन र सरकारको कामकारबाहीसँग सम्बन्धित रहेर आफ्नो असन्तुष्टि दर्ज गराएका छन् । सचिवालको बैठक बुधबारसम्मका लागि स्थगित भएकाले नेपालको असन्तुष्टि पत्रमाथि कुनै छलफल हुन सकेन ।
