विशेष खुलासा: नेपाली कांग्रेस विभाजनको अन्तिम विन्दुमा! गगन थापा भर्सेस देउवा-खड्का गुटको महासंग्राम

काठमाडौं । नेपाली राजनीतिमा यतिबेला महाभूकम्प गएको छ। विशेष महाधिवेशनबाट गगन थापा सभापति चुनिएसँगै र देशको फेरिएको राजनीतिक समीकरणले झण्डै ८ दशक लामो इतिहास बोकेको नेपाली कांग्रेस फुटको सँघारमा पुगेको छ। अदालतको अन्तिम फैसला आउनुअगावै पार्टीभित्रका दुई धारबीच ‘वारपार’को स्थिति सिर्जना भएको छ।

जेन-जी आन्दोलन र देउवाको बहिर्गमन

ऐतिहासिक ‘जेन-जी’ (Gen Z) जनआन्दोलनपछि तत्कालीन राजनीतिमा ठूलो फेरबदल आयो। आन्दोलनका क्रममा घाइते भएका निवर्तमान सभापति शेरबहादुर देउवा हाल उपचार र आरामका लागि राजनीतिबाट टाढा रहेका छन्। उनले आफ्नो अनुपस्थितिमा पूर्णबहादुर खड्कालाई कार्यवाहक सभापतिको जिम्मेवारी सुम्पिएका थिए। तर, पार्टीको विशेष महाधिवेशनले युवा नेता गगन थापालाई सभापतिमा निर्वाचित गरेपछि कांग्रेसभित्र दुईवटा समानान्तर शक्ति केन्द्र निर्माण भएका छन्।

बालेन्द्र शाह सरकारको ‘एक्सन’ र कांग्रेसको डर

२०८२ फागुन २१ को आम निर्वाचनपश्चात् देशको राजनीतिले नयाँ मोड लियो। रवि लामिछाने सभापति रहेको पार्टीको नेतृत्वमा सरकार बन्यो, जहाँ बालेन्द्र शाह प्रधानमन्त्री र सुदन गुरुङ गृहमन्त्रीका रूपमा शक्तिशाली उदाएका छन्।

गृहमन्त्री गुरुङले पुराना भनिएका शीर्ष नेताहरूको ‘शंकास्पद धन सम्पत्ति’ र ‘रबाफिलो जीवनशैली’ माथि कडा छानबिन सुरु गरेपछि देउवा पक्षीय नेताहरूमा ढ्याङ्ग्रो ठोकेको छ। आफ्नो सम्पत्ति जोगाउन र अनुसन्धानबाट बच्न देउवा-खड्का समूह अहिले एक ढिक्का भएर रक्षात्मक रणनीतिमा लागेको छ।

गगन थापाको अडान: ओली र लेखकमाथि छानबिन हुनैपर्छ

पार्टी सभापति गगन थापा भने भ्रष्टाचार र अनियमितता विरुद्ध आक्रामक रूपमा प्रस्तुत भएका छन्। उनले जेन-जी आन्दोलनका बेला दमनमा मुछिएका तत्कालीन प्रधानमन्त्री केपी शर्मा ओली र तत्कालीन गृहमन्त्री रमेश लेखकमाथि कडा छानबिन हुनुपर्ने अडान राखेका छन्।

“पुरानो पुस्ताका नेताहरूले गरेको अनियमितताको भारी नयाँ कांग्रेसले बोक्न सक्दैन। दोषी जोसुकै होस्, छानबिनको दायरामा आउनुपर्छ,” सभापति थापाको यो स्पष्ट सन्देशले पार्टीभित्रको देउवा-खड्का समूहलाई विद्रोही बनाएको छ।

फुटको सँघारमा कांग्रेस: के होला अब?

अदालतले यी गम्भीर विषयमा आफ्नो फैसला सुनाउनुअघि नै कांग्रेस दुई फ्याक हुने निश्चित देखिएको छ। एकातिर ‘भ्रष्टाचारको अनुसन्धानलाई सघाउने’ गगन थापाको समूह छ भने अर्कोतिर ‘पुराना नेताको संरक्षण गर्ने’ देउवा-खड्काको समूह।

नेपालको राजनीतिमा यो घटनाक्रमले कुन नयाँ मोड लिने हो र प्रधानमन्त्री बालेन्द्र शाहको सरकारले सुरु गरेको यो ‘सफाई अभियान’ कहाँ पुगेर टुङ्गिने हो, त्यसले नै कांग्रेसको भविष्य तय गर्नेछ।

बिशेष रिपोर्ट: www.everestonlinekhabar.com