अमेरिकाद्वारा भेनेजुएलाको तेल क्षेत्रमा नयाँ प्रतिबन्ध: ४ कम्पनी र ४ ट्याङ्कर कालोसूचीमा

वासिङ्टन डीसी संयुक्त राज्य अमेरिकाले भेनेजुएलाको निकोलस मादुरो प्रशासनमाथि आर्थिक दबाब बढाउने रणनीति अन्तर्गत नयाँ प्रतिबन्धको घोषणा गरेको छ। अमेरिकी अर्थ मन्त्रालयको ‘अफिस अफ फरेन एसेट्स कन्ट्रोल’ (OFAC) ले बुधबार एक विज्ञप्ति जारी गर्दै भेनेजुएलाको तेल निर्यातमा सहयोग पुर्‍याउने कम्पनी र जहाजहरूमाथि कारबाही गरिएको जनाएको हो।

भेनेजुएलाको तेल क्षेत्रमा काम गर्ने चार कम्पनीहरू।

चारवटा ठूला तेल ट्याङ्करहरू (Nord Star, Lunar Tide, Rosalind, र Della) लाई प्रतिबन्धित सम्पत्ति घोषणा गरिएको छ। यी कम्पनी र जहाजहरूले मादुरो शासनलाई आर्थिक लाभ पुर्‍याउन ‘छाया फ्लिट’ (Shadow Fleet) को रूपमा काम गरेको र प्रतिबन्ध छल्न सहयोग गरेको अमेरिकाको आरोप छ।

ट्रम्प प्रशासनको कडा रणनीति
अमेरिकी राष्ट्रपति डोनाल्ड ट्रम्पले मादुरो शासनलाई ‘अवैध’ र ‘नार्को-आतंकवादी’ (Narco-terrorist) को संज्ञा दिँदै भेनेजुएलाका तेल ट्याङ्करहरूमाथि पूर्ण नाकाबन्दीको आदेश दिनुभएको छ। ट्रेजरी सचिव स्कट बेसेन्टले भन्नुभयो, “मादुरोको अवैध शासनले एकातिर अमेरिकामा घातक लागूऔषध पठाइरहेको छ भने अर्कोतिर तेल निर्यात गरेर लाभ लिइरहेको छ। हामी यो कदापि हुन दिने छैनौँ।”

प्रतिबन्ध;
सम्पत्ति रोक्का: प्रतिबन्धित कम्पनी र जहाजहरूको अमेरिकामा रहेको वा अमेरिकी नागरिकको नियन्त्रणमा रहेको सम्पूर्ण सम्पत्ति र स्वार्थहरू रोक्का (Freeze) गरिएका छन्।

कारोबारमा रोक: कुनै पनि अमेरिकी नागरिक वा संस्थाले यी कम्पनी र जहाजहरूसँग व्यावसायिक कारोबार गर्न पाउने छैनन्।

अन्तर्राष्ट्रिय दबाब: यी जहाजहरूलाई सेवा दिने वा कारोबार गर्ने अन्य विदेशी बैंक वा संस्थाहरूले पनि अमेरिकी प्रतिबन्धको सामना गर्नुपर्ने हुनसक्छ।

भेनेजुएलासँग विश्वकै सबैभन्दा ठूलो प्रमाणित तेल भण्डार छ, तर लामो समयदेखिको राजनीतिक अस्थिरता र अमेरिकी प्रतिबन्धका कारण यसको उत्पादन र निर्यातमा भारी गिरावट आएको छ।

हालैका हप्ताहरूमा अमेरिकी सेनाले भेनेजुएलाको तट नजिकै दुईवटा तेल ट्याङ्करहरू जफत गरिसकेको छ। राष्ट्रपति ट्रम्पले भेनेजुएलाले विगतमा अमेरिकी तेल कम्पनीहरूबाट जफत गरेका सबै सम्पत्ति र भूमि फिर्ता नगर्दासम्म यो दबाब अभियान जारी रहने चेतावनी दिनुभएको छ।